Haut lòc deu jazz, de l’improvisacion amei deu happening, lo Hestenau d’Usèsta, creat en 1977, es lo lòc de totas las oralitats. Qu’es atau qu’au destorn de las programacions, de las rencontras d’escasença, flaütas de tres horats, acordeon, rondèu o polcà s’i tròban tota sa plaça.
Musica populària e oralitat gascona son de verai intimament ligadas a la formacion de Bernat Lubat, creator deu hestenau, e de certans deus performers màgers de la Companhia Lubat de Gasconha, tau com lo Biarnés Andriu Minvielle salhit d’una vertadèra dinastia de cantanèirs de polifonia.
Hilh d’Usèsta, Bernat Lubat ne ven pas musicaire per escasença. Sos parents tenen lo cafè-restaurant-ostalaria-especieria l’Estaminet. Son pair, Alban, es tanben un deus musicaires polí-instrumentistas (trompèta, bateria, acordeon) màgers deus bals, hèstas e maridatges deu país on valsa, paso doble, cha-cha, crotzan polcàs, escotishs amei los rondèus gascons eishuts de l’ancian hons coregrafic europenc. Bernat l’acompanha a l’acordeon tanlèu l’atge de cinc ans.
